ភ្នំពេញ៖ អនុរដ្ឋលេខាធិការក្រសួងការងារ និងបណ្ដុះបណ្តាលវិជ្ជាជីវៈ លោក លុច្ស តារា ត្រូវបានតែងតាំងជានាយកខុទ្ទកាល័យ ឯកឧត្តមអគ្គលេខាធិការអាស៊ាន ដែលមានមូលដ្ឋាននៅទីក្រុងហ្សាការតា ប្រទេសឥណ្ឌូណេស៊ីនាពេលខាងមុខ។ មុខទៅបំពេញភារកិច្ច លោកបានចូលទៅជួបសំដែងការគួរសម និងជម្រាបលាលោក អ៉ិត សំហេង នៅថ្ងៃទី២៨ ខែមីនា ឆ្នាំ២០២៣។

រដ្ឋមន្ត្រីក្រសួងការងារ លោក អ៉ិត សំហេង បានអបអរសាទរចំពោះលោក លុច្ស តារា ដែលទទួលបានការតែងតាំងជានាយកខុទ្ទកាល័យឯកឧត្តមអគ្គលេខាធិការអាស៊ាន ហើយក៏ជាមុខមាត់មួយសម្រាប់ប្រទេសកម្ពុជា ក៏ដូចជាមោទនភាពសម្រាប់ក្រសួង ដែលមានមន្ត្រីរបស់ខ្លួនទៅបម្រើការនៅលេខាធិការដ្ឋានអាស៊ាន។

នាឱកាសនោះលោក អ៉ិត សំហេង បានណែនាំឱ្យលោក ខិតខំប្រឹងប្រែងបំពេញភារកិច្ចឱ្យបានល្អ ដើម្បីលើកកម្ពស់កិត្យានុភាពអាស៊ានទាំងមូលឱ្យកាន់តែខ្ពស់ត្រដែត នៅក្នុងឆាកតំបន់ និងអន្តរជាតិ។ លោក អ៉ិត សំហេង ក៏បានណែនាំឱ្យលោក លុច្ស តារា ជួយជំរុញគម្រោងនានា ដែលអាចនាំផលប្រយោជន៍ជូនប្រទេសជាតិ ជាពិសេសពាក់ព័ន្ធនឹងវិស័យការងារ និងទេសន្តរប្រវេសន៍៕